Në një kohë kur situata politike po ‘zien’ nga zhvillimet e njëpasnjëshme, presidenti Meta njofton një tjetër dalje publike, në kuadër të sqarimit të opinionit publik.
Njoftimi është dhënë nga Presidenca, ndërsa konferenca e sotme vjen një ditë pasi Meta firmosi live shfuqizimin e dekretit për zgjedhjet vendore, pasi presidenti e konsideroi këtë moment si rrezik serioz për sigurinë publike, stabilitetin demokratik, qetësinë dhe paqen në vend, ndërsa theksoi se pa pasur një datë të caktuar nga vetë ai nuk mund të mbahen zgjedhjet, të cilat janë shtyrë në një afat të pacaktuar.
Kujtojmë se vendimi i Metës ka vënë në lëvizje socialistët, të cilët po përgatiten për të nisur procedurat për shkarkimin e presidentit, ndërsa PS ka nisur edhe mbledhjen e firmave.
Ndërkohë, vendimi i Metës është vlerësuar si i drejtë nga opozita, e cila është shprehur se shtyrja e zgjedhjeve vendore shmangu përplasjet civile.
Megjithatë, kryeministri Rama insiston se zgjedhjet do të mbahen më 30 qershor.
