Presidenti Ilir Meta është nisur në këmbë nga Presidenca drejt Kryesisë së Kuvendit për të dëshmuar në Komisionin Hetimor, i ngritur posaçërisht për shkarkimin e tij për zhdrekretimin e zgjedhjeve të 30 qershorit.
“Unë nuk jam për spektakël politik, por Presidenca do të mbetet kështjellë e mbrojtjes së Kushtetutës dhe rrugës europiane të vendit”, tha Meta.
“Jam shumë i motivueshëm në të gjitha vendimet e mia. Do të jem president i Republikës deri në vitin 2022”, shtoi ai për mediat.
Meta shoqërohet nga Këshilltari për Sigurinë, Bahri Shaqiri, Këshilltari Ligjor, Bledi Dervishaj si dhe këshilltari për Mediat, Tedi Blushi.
Komisioni Hetimor për kreun e shtetit është ngritur për të hetuar nëse ai ka shkelur Kushtetutën duke anuluar zgjedhjet e 30 qershorit.
Ndërkohë, në media kanë qarkulluar lajme se kreu i shtetit do të paraqesë një serë dokumentesh që provojnë sipas tij kush janë shkelësit e vërtetë të Kushtetutës, por pa specifikuar me tepër se për çfarë provash behet fjalë.
