Kreu i Partisë së Lirisë, Ilir Meta ka akuzuar kryeministrin Edi Rama se është pikërisht ai që qëndron pas e-mail-it anonim për shtetasin me iniciale I. M.
Meta deklaroi se kreu i qeverisë me kalimin e ligjit për hapjen e dosjeve të ish Sigurimit, bëri një autogol që do i kushtojë shtrenjtë. Në një konferencë për mediat, kreu i Partisë së Lirisë, Ilir Meta, akuzoi kryeministrin Rama, si shpikësi i email-it anonim “I.M”. Meta tha gjithashtu se Rama është duke u trembur nga Partia e Lirisë.
“Tani Rama kërkon të shmangë vëmendjen nga këto 1 miliard dollarë të reja që planifikon për 7 kontrata të reja për vitin që vjen. Këtu ka lekë për pedagogë, student, pensione. Po ai nuk rrit dot këto se s’do shkojnë në xhepin e tij. Ai fryn kontratat, PPT me qëllim për ti mbajtur ai.
Rama është shpikësi email-it anonim, e di mirë që ka bërë një autogol që do i kushtojë shumë. Por ai ka më shumë gjëra të tjera. Partia e Lirisë e tmerron, ia prish gjumin. Sa i takon Autoritetit të manipulimit ju e dini që me atë jemi në një proces gjyqësor dhe do të vazhdojë. Kuvendi i Shqipërisë është tromaksur nga aktet që ka parë kryetarja e Kuvendit, dhe e kanë tromaksur dhe atë. Tani të gjithë e dimë që kemi të bëjmë me një akt mafioz. Dhe zgjidhja është Edi Rama, i cili është një peng, se ai nuk është zoti i kësaj afere, ai është pengu i kriminelëve”, përfundoi Meta.
Ilir Meta tha se ligji i miratuar dje në Kuvend për hapjen e dosjeve të ish-Sigurimit, është si shprehja popullore “u mbars mali dhe polli një mi”.
Duke bërë ironi me një video të Ramës me breshkat në zyrën e tij, Meta tha se uron që ky “mi”, ta ndihmojë kryeministrin me frymëmarrjen për betejat që do të vijnë.
“Ilir Meta i ka mbajtur të gjitha premtimet e tij, meqë përmendët Allende, e kam bërë atë deklaratë dhe e dija se çfarë vinte pas saj, por nëse do isha Allende, Rama s’do ishte dot Pinochet. Unë e kam mbajt premtimin tim dhe deri në 24 korrik aty ka qenë një kështjellë e paprekshme e Kushtetutës dhe i kam fituar të gjitha betejat.
Për çështjen e ligjit që ca kanë bërë këta mbrëmë, dihet, “u mbars mali dhe polli një mi”… Mali u mbars në 25 korrik nga një e-mail anonim dhe polli mbrëmë ne mes të natës një mi”.
