Në kuadër të vizitës zyrtare në Bullgari, Presidenti Ilir Meta u prit në takim nga Kryetari i Asamblesë Kombëtare të Republikës së Bullgarisë, Nikola Minchev. Gjatë takimit, Kreu i Shtetit shqiptar dhe Kryeparlamentari Minchev diskutuan mbi rëndësinë e forcimit të dialogut politik ndërparlamentar, dhe fuqizimit të bashkërenditjes mes Grupeve të Miqësisë në konkretizimin e politikave dhe projekteve qeverisëse, si në rrafshin dypalësh, ashtu edhe në atë rajonal.
Presidenti Meta theksoi se krijimi i një rrjeti dinamik ndërparlamentar mes Italisë, Shqipërisë, Maqedonisë së Veriut dhe Bullgarisë, për të mbështetur dhe jetësuar realizimin e Korridorit VIII, si një aks i rëndësishëm gjeostrategjik, do të ishte hapi i duhur në kohën e duhur.
Zhvillimet e reja e bëjnë edhe më të domosdoshëm dhe imediat rivitalizimin dhe përshpejtimin e Korridorit VIII, jo vetëm si një korridor zhvillimi midis Detit Adriatik dhe Detit të Zi, por edhe si një korridor sigurie.
Ndaj është i domosdoshëm bashkëpunimi i përhershëm edhe në nivel parlamentar të tre vendeve tona, por edhe të Italisë dhe vendeve të tjera të Bashkimit Europian për të nxitur Qeveritë tona dhe institucionet ndërkombëtare në konkretizimin e projekteve, që përshpejtojnë proceset integruese në rajon.
Bullgaria, edhe si vend anëtar i BE, do të luajë një rol të rëndësishëm në këtë kuadër.
“Bashkëpunimi ndërparlamentar ka një rol të pazëvendësueshëm, nxitës dhe jetësor në përshpejtimin e procesit të integrimit në Bashkimin Europian të Shqipërisë, Maqedonisë së Veriut dhe të të gjitha vendeve të Ballkanit Perëndimor”, u shpreh Presidenti Meta.
