PD ka apeluar ndaj presidentit Meta, që të mos i hapë rrugë ligjit që lejon prishjen e Teatrit. Mesditën e sotme, dy deputetet Albana Vokshi dhe Dhurata Çupi kanë qenë të pranishme tek Teatri Kombëtar, për të firmosur peticionin me të cilit kërkohet kthimi i ligjit nga presidenti. Vokshi tha më tej se ky është një ligj mafioz.
“Iu bëj thirrje autoriteteve më të larta, për të mos lejuar miratimin e një ligji mafioz, që është një akt kriminal antikushtetues. Ardhja jonë për të firmosur këtë peticion, tregon që PD është e angazhuar për të përdorur çdo mjet, për t’i thënë ndal këtij akti kriminal që shkatërron një nga godinat më të vjetra, historike.
Edi Ramës nuk i intereson fare as arti, e as kultura. Nuk ka të bëjë me teatër të ri. I bëjmë thirrje presidentit Ilir Meta të mos i hapë rrugë këtij akti antikushtetues.
Ftoj qytetarët të bëhemi bashkë. Ne do vazhdojmë rezistencën tonë në komisione. Do vazhdojmë t’i kërkojmë qeverisë që ta kthejë mbrapsht këtë projektligj. Nuk duhet lejuar asnjë projektligj që përmban shkatërrimin e Teatrit Kombëtar.
I kemi dërguar letra sensibilizimi edhe institucioneve ndërkombëtare, për të ndalur shkatërrimin e monumenteve të kulturës”, tha Vokshi.
Kujtojmë këtu se mazhoranca me 74 vota pro kaloi projektligjin për Teatrin Kombëtar, duke i hapur kështu rrugën ndërtimit të objektit të ri. Vetëm 46 votat kundër të opozitës, nuk kishin sesi ta bllokonin këtë nismë.
