Presidenti i Republikës Ilir Meta, ka bërë me dije se është gati padia për Kuvendin për “falsifikim dokumentesh”.
“Sot kam firmosur kallëzimin penal si President i Republikës kundër strukturave dhe funksionarëve përgjegjës, në Kuvendin e Shqipërisë për veprat penale të kryera në bashkëpunim, atë të falsifikimit të dokumenteve. Sapo ky kallëzim të depozitohet në Prokurorinë e Posaçme dhe në Prokurorinë e Tiranës dhe për dijeni Prokurorisë së Përgjithshme do ta publikojmë të plotë në faqen zyrtare të Presidencës”, tha Meta.
“Kjo është një padi shumë e rëndësishme, për arsye se krimi i falsifikimit, është shumë flagrant, ndodh për herë të parë në një seancë publike të GJK nga Kuvendi i Shqipërisë në një proces që ndodh për herë të parë në 30 vite kundër kreut të shtetit, dhe ky krim, falsifikim, tregon shumë qartë jo vetëm sesi ka funksionuar Kuvendi një partiak i deri para 25 Prillit, por është një dramë sesi po funksionon edhe ky Kuvend me opozitë”, tha Meta.
Konferenca jo e zakonshme mbahet në një kohë kur Gjykata Kushtetuese, pritet të shpallë vendimin për shkarkimin ose jo të kreut të shtetit.
Kushtetuesja më 7 shkurt, u tërhoq për vendim me një afat brenda 30 ditëve nga kjo datë.
