Presidenti Ilir Meta ka reaguar pas prezantimit të planit financiar nga kryeministri Rama. Gjatë fjalës së tij kreu i qeverisë tha se do t’i përgjysmohej paga deputetëve dhe Këshillit të Ministrave, ndërsa presidentit Meta ia la të lirë zgjedhjen.
Përmes një postimi në Facebook, Meta e përshëndet nismën në fjalë, teksa shton se jo vetëm paga e tij, por do të ketë shkurtim dhe të fondit buxhetor të Institucionit të Presidentit.
Meta i kërkoi gjithashtu qeverisë që të bëjë transparente detajimin e fondeve, për t’u dhënë përgjigje nevojave emergjente të qytetarëve.
Postimi i plotë:
Përshëndes mbështetjen financiare të bërë publike nga Kryeministri.
Ftoj Qeverinë të përcaktojë sa më parë kriteret e ndihmës për biznesin dhe familjet më në nevojë.
Inkurajoj gjithashtu konsultimin me grupet e interesit për të bërë transparente detajimin e fondeve, për t’u dhënë përgjigje të menjëhershme nevojave emergjente të qytetarëve.
Sa i përket trajtimit financiar të Presidentit të Republikës, ai do të shkurtohet në të njëjtën mënyrë, si dhe për zyrtarët e lartë të shtetit, të parashikuar në planin e bërë publik.
Po kështu Institucioni i Presidentit të Republikës është solidarizuar me shkurtimin e fondit të buxhetit vjetor në interes të riadresimit të tyre, në mbështetje të shëndetësisë dhe sektorëve të vijës së parë në këtë përballje me pandeminë globale të COVID 19.
Bashkëpunimi, gjithëpërfshirja, humanizmi dhe solidariteti mbarëkombëtar do të na japë të gjithëve fuqinë e duhur pozitive për ta fituar këtë sfidë, duke mundur frikën, me besimin e palëkundur te e ardhmja dhe në Zot.
