Komisioni për Rithemelimin e Partisë Demokratike, i krijuar nga ish-kryeministri Sali Berisha, Lëvizja Socialiste për Integrim me në krye Monika Kryemadhin dhe Partia Demokristiane e Nard Ndokës, kanë dorëzuar pranë KQZ-së një kërkesë, teksa kërkojnë regjistrimin për zgjedhjet e pjesshme vendore të 6 marsit si koalicioni “Shtëpia e Lirisë”.
“Lënda: Kërkesë për regjistrimin në KQZ të koalicionit zgjedhor. Mbështetur në nenin 65 e vijues te Ligjit Nr 10019 date 29 12.2008, Kodi Zgjedhor i Republikës se Shqipërisë”. ndryshuar, partia “Lëvizja Socialiste për Integrim”, si parti udhëheqëse e koalicionit, kërkon Komisionit Qendror të Zgjedhjeve regjistrimin e koalicionit zgjedhor për zgjedhjet e pjesshme vendore, te datës 6 mars 2022. Emri i koalicionit është: “Shtëpia e Lirisë (LSI-PD Komisioni i Përkohshëm Rithemelimit-PDK); Shkronjat nistore te Koalicionit do të jene: “SH-L””, thuhet në kërkesën e LSI dorëzuar në Komisionin Qendror të Zgjedhjeve.
Ish-deputeti i PD, Azgan Haklaj deklaroi në emisionin “Repolitix”, se me këtë vendim Berisha është bërë pjesë e LSI-së. “Kur Meta shpalli zgjedhjet e pjesshme, u duk sikur e bëri që ta zërë në befasi PD dhe Bashën, por ndodhi e kundërta, dhe luajti në hapësirën që i jepte Kushtetua, për t’i thënë që mbështet Foltoren, dhe Foltorja do jetë pjesë e LSI. Berishës i interesonte që të futeshe ne polin e tretë, dhe pasi s’e mori dot, gjeti një kasolle për t’u mbrojtur”, tha Haklaj.
Presidenti Ilir Meta ka pranuar se ka negociuar me ish-kryeministrin për koalicionin “Shtëpia e Lirisë” që ka bërë me LSI-së, për zgjedhjet e pjesshme lokale të 6 marsit. Dy ditë më parë ishte ish-kryeministri Berisha, ai cili zbuloi se kishte takuar presidentin Meta, ndërkohë që kjo është konfirmuar dje dhe nga vetë kreu i shtetit.
Ky i fundit teksa ishte duke folur dje në emisionin “Pushteti” në Fax News, zbuloi se ishte takuar këtë fundjavë me Berishën, takim ky që sipas Metës, ka qenë konstruktiv dhe janë hedhur piketat e aleancës së tij me ish-liderin demokrat.
Pjesë nga biseda
Zoti Berisha na bëri të ditur se ishte konsultuar me ju?
Meta: Tjetër takimi, tjetër konsultimi, tjetër negociata. Kolegu juaj Çim Peka është ngatërrestar i paparë. Jemi takuar me z. Berisha. Unë e kam kërkuar që në nëntor të vitit para zgjedhjeve. U bënë 14 muaj. Ka pasur disa probleme, në rrethanat familjare, e kështu me radhë. Më në fund u takuam. Jemi takuar para 3-4 ditësh.
Në fundjavë?
Meta: Unë me z. Berisha takohem çdo sekonde. Çdo njeri që troket këtu, unë e pres. Nuk është karrigia ime. Zotëria e ka derën hapur këtu dhe në shtëpinë time 24 orë. Kjo nuk do të thotë që ne ndajmë të njëjtat qëndrime për çdo çështje. Ashtu siç nuk kemi ndarë kur ishim në qeveri. Dhe kjo na bashkon.
Bashkëpunëtor me ju Berisha kur të riktheheni?
Meta: Për të mirën e vendit, bashkëpunoj me çdo njeri që nuk prek sovranitetin, demokracinë. Unë e kam thenë para disa muajsh. Vjen e bëhet dhe më tërheqës dhe më demokrat. Primaret tani po i sjell. Unë e kam pasur bindje dhe më para se vendi nuk i lihet elitave, sepse mund të korruptohen dhe shantazhohen lehtë. Ne kemi parë se si bëhen pengë të faktorëve të ndryshëm.
