Kreu i Shtetit, Ilir Meta, ka dalë sot në një konferencë të jashtëzakonshme, ku foli për çeljen e negociatave me BE. Presidenti ka vlerësuar miratimin e rezolutës për Shqiperinë në Parlamentin Evropian, por ka renditur te gjitha shqetesimet e ngritura në raport dhe detyrat që ka me tej vendi ynë.
“Janë diagnostikuar të gjitha problemet që deri tani e kanë bërë të pamundur perparimin evropian të vendit tonë”, theksoi kreu i shtetit.
“Meqë keni qenë të angazhuar me ecurinë e negociatave, mendova një ditë më të qetë për çështjen e çeljes së negociatave me BE. Dua të vlerësoj sot rezolutën e miratuar në PE. Dua të vlerësoj mbështetjen e gjerë politike ndaj perspektivës për anëtarësim të plotë të Shqipërisë e Maqedonisë së Veriut, dhe gjuhën e drejtpërdrejt të përshkrimit të situatës në vendin tonë e atyre detyrave që pritet të përmbushen nga Shqipëria në vazhdim.
Rezoluta kujton se anëtarësimi përfundimtar varet nga reforma të qëndrueshme, të thella e pakthyshme, duke nisur nga sundimi i ligjit. Rezoluta shpreh shqetësim për klimën e polarizuar politike, e mungesën e bashkëpunimit të qëndrueshëm partiak.
Shpreh keqardhje për ndryshimet jokonsensuale të Kushtetutës e kodit zgjedhor nga mazhoranca qeverisëse para 25 prillit. Rezoluta bën thirrje politikës shqiptare të tregojë maturi, të rrisë demokracinë e integritetin konkurrues brenda partiak.
Shpreh shqetësim për mungesën e dënimeve përfundimtare, për rastet e blerjes së votës. Shpreh nevojën për të përmirësuar demokracinë pjesëmarrëse, përfshirë miratimin e një ligji për referendumet. Shpreh nevojën për përmirësim urgjent të lirisë së shprehjes.
Shqetësohet për mungesën e progresit, se ka rënë me 8 vende për lirinë e shtypit. Kërkon që autoritetet të zbatojnë politikë të tolerancës zero kundër frikësimit e dhunës ndaj mediave. Shpreh shqetësim për rrjedhjet masive të të dhënave personale”.
