Presidenti Ilir Meta ka dekretuar shkarkimin e gjeneralit major të Forcave Detare, Ylber Dogjani.
Ky vendim vjen shtatë muaj pas skandalit të vjedhjes së armëve në bazën ushtarake të Pashalimanit. Kujtojmë që vetëm pak ditë pas skandalit, shkarkimi i Dogjanit u kërkua nga ministrja e Mbrojtjes Olta Xhaçka, por nuk pati një përgjigje.
Dogjani ishte emëruar në këtë detyrë në vitin 2015, kohë kur ministre ishte Mimi Kodheli dhe PS ishte në koalicion me LSI.
Ndërkohë që, Presidenca sqaron se shkarkimi i Dogjanit është bërë për shkak të mbarimit të mandatit.
DEKRET PËR SHKARKIM NGA DETYRA TË KOMANDANTIT TË FORCËS DETARE
Në mbështetje të pikës 3, të nenit 169, nenit 93 të Kushtetutës, të nenit 9, pika 3, germa “c”, të ligjit nr. 64/2014, “Për pushtetet dhe autoritetet e drejtimit e të komandimit të Forcave të Armatosura të Republikës së Shqipërisë”, të ndryshuar, me propozim të Ministrit të Mbrojtjes,
Dekretoj
Neni 1
Gjeneral Major Ylber Selman Dogjani, shkarkohet nga detyra e Komandantit të Forcave Detare, për shkak të mbarimit të mandatit.
Neni 2
Ky dekret hyn në fuqi menjeherë.
Nr. i Dekretit 11245
Tiranë, më 31.07.2019
