Ilir Meta ka pritur sot në selinë Partisë së Lirisë, ambasadoren amerikane në Tiranë, Yuri Kim, teksa ka ndarë edhe detaje në lidhje me takimin mes tyre. Sipas Metës është diskutuar në mënyrë konstruktive mbi bashkëpunimin e Partisë së Lirisë me SHBA-në.
“Sot mirëprita në selinë e Partisë së Lirisë Ambasadoren e Shteteve të Bashkuara të Amerikës, znj. Yuri Kim. Ishte kënaqësi të diskutonim hapur dhe në mënyrë konstruktive mbi bashkëpunimin e Partisë së Lirisë me SHBA, në interes të forcimit dhe intensifikimit të partneritetit strategjik midis Shqipërisë dhe SHBA, përmbushjes të detyrimeve tona si vend anëtar i NATO-s, si dhe reformave prioritare të përshpejtimit të integrimit europian të Shqipërisë dhe Ballkanit Perëndimor në BE”.
Marrëdhënia mes palëve nuk ka qënë gjithmonë kaq e mirë. Gjatë fushatës elektorale të vitit 2021, Ilir Meta, në rolin e presidentit të vendit, sulmoi asokohe ambasadoren amerikane Yuri Kim, ku i kërkonte që mos të ndërhynte në zgjedhjet parlamentare. Vetë diplomatja amerikane dënoi gjuhën e ashpër të Ilir Metës, gjatë fushatës elektorale, ku ish-kreu i shtetit u bënte thirrje qytetarëve, që të mprehin sfurqet e sëpatat që të mbrojnë votën. Duket se këto përplasje janë lënë pas, e mesa duket marëdhëniet tashmë janë kthyer në normalitet.
