Kreu i Partisë së Lirisë, Ilir Meta, sikurse kishte paralajmëruar ka dorëzuar sot zyrtarisht kallëzimin penal ndaj Autoritetit të Dosjeve. Ai shprehet me anë të një postimi në Facebook se ka kallëzuar penalisht anëtarët e Autoritetit të Dosjeve, për ato që ai i cilëson si shkeljet e rënda dhe të qëllimshme që i kanë bërë ligjit organik për dosjet e ish-Sigurimit të Shtetit, për manipulimet dhe falsifikimet flagrante në shërbim të shantazhit politik, për llogari të Edi Ramës.
Kallëzimi i tij vjen pas akuzave se një politikan i lartë me iniciale I.M., ka qenë bashkëpunëtor i ish-Sigurimit të Shtetit, për të cilin mazhoranca thotë se është Ilir Meta.
Postimi nga Meta
“Të dashur qytetare dhe qytetarë,
Sot kam kallëzuar penalisht anëtarët e Autoritetit të Dosjeve për shkeljet e rënda dhe të qëllimshme që i kanë bërë ligjit organik për dosjet e ish-Sigurimit të Shtetit, për manipulimet dhe falsifikimet flagrante në shërbim të shantazhit politik, për llogari të Edi Ramës.
Për më shumë detaje, do të zhvilloj një konferencë shtypi në funksion të transparencës para të gjithë qytetarëve shqiptarë”.
