Meta akuzon Vuçiçin: Ndërhyri në punët e brendshme të Shqipërisë

Presidenti i Republikës, Ilir meta ka akuzuar homologun e tij serb, Aleksandër Vuçiç për ndërhyrje në punët e brendshme të Shqipërisë.

Në një konferencë të jashtëzakonshme për mediat, Meta u shpreh se Vuçiç tha parrulla, duke iu referuar deklaratës së tij pak ditë më parë, se kryedemokrati Lulzim Basha është kukull e ish-kryeministrit, Sali Berisha.

Gjatë fjalës së tij, Meta u shpreh se ka respekt për partnerët ndërkombëtarë, e veçanërisht ato të SHBA-ve, duke iu referuar ambasadores Yuri Kim.

Ilir Meta: ”Siç e dini ju, Presidenti i Serbisë ndërhyri në punët e brendshme të Shqipërisë. Doli me parrullën se Luli është kukull e doktorit. Kishte edhe sondazhe nga Batoni, njeriu më i besueshëm i Beogradit. E gjithë këto që ndodhën në Elbasan dhe Kavajë e që duan të bëjnë në Vlorë e kudo janë pjesë e skenarit..

Duke përdorur policinë e partisë, prokurorët e Agacit që udhëheq vetingun që ka bërë gjithë aferat. Kjo gjë nuk do ndodhë. Kam respekt për gjithë partnerët ndërkombëtarë e të palëkundur të ShBA i dua se na kanë frymëzuar për liri e demokraci. Jam i përkushtuar që Shqipëria të angazhohet sa më shpejt në BE, dhe Shqipëria nuk do bëhet gazi i Botës nesër. JO ! Shqipëria do të shndrrisë sepse shqiptarët do votojnë për Shqipërine e shqiptarëve. Prokuroria e policia të bëjnë detyrën të zbatojnë ligjin.

Nuk impresionohem nga ata lobistë që flasin anglisht dhe mendojnë serbisht për Shqiperinë. qytetarët janë ndërgjegjësuar, me hir e pa hir Shqipëria nesër do jetë model. Presidenti ka vetëm një votë të barabartë me gjithë të tjerët. kështu që ju falënderoj shumë, ju ftoj të jeni në gatishmëri të parandalojmë cdo incident, parandalimi më i mirë është pergjigjet e shpejta. Boll  u bë 4 vjet ping pong me dosjen e Shijakut e Dibrës.”