Presidenti Ilir Meta dekoroi pak minuta më parë Presidentin e UEFA-s, i cili ndodhet në Shqipëri, si i ftuar special në ditën e inaugurimit të stadiumit të ri Kombëtar.
Në fjalimin e tij, Kreu i Shtetit, ka zbuluar një detaj që lidhet me rininë e tij.
30 vite më parë, gjatë kohës që ishte student, Meta ka bërë edhe komentatorin e ndeshjeve të futbollit në emisionin radiofonik në Shqipëri “Nga njëra ndeshje në tjetër”.
“I nderuar Z.Ceferin, i nderuar Z.Duka, të nderuar personalitete të futbollit shqiptar, Europianë dhe Botërorë, të nderuar miq e të ftuar, iu uroj të gjithëve, mirë se erdhët të gjithë në Presidencë.
Kur isha student, 30 vite më parë, isha dhe komentator i ndeshjeve të futbollit në emisionin më të ndjekur radiofonik në Shqipëri “Nga njëra ndeshje në tjetër”.
Edhe sot mbetem shumë i lidhur më këtë sport kaq të dashur për të gjithë.
E konsideroj si privilegj të veçantë të nderoj një personalitet, presidentin Ceferin. Një nga personat më të dashur dhe mbështetësit më të madh në dobi të sportit më të dashur të shqiptarëve, futbollin.
E falenderoj zotit Ceferin për të gjithë iniciativat në të mirë të futbollit”, u shpreh Meta.
