Lionel Messi është një nga futbollistët më të suksesshëm në të gjithë botën. Një lajm i cili së fundmi po bën xhiron në mediet botërore është ai i një largimi të mundshëm të yllit të futbollit nga Barcelona në drejtim të një tjetër skuadre.
Sipas “El Pais”, katalanasit dhe 32-vjeçari kanë arritur një marrëveshje, e cila i jep të drejtën Messi-t të largohet nga “Kam Nou”, në fund të çdo sezoni.
Klubi spanjoll i ka bërë me dije lojtarit se ai ka dritën jeshile të largohet kur të dojë, nëse dëshiron largimin. Është arritur një pakt që nëse sulmuesi kërkon largimin, atëherë Barcelona do ta lërë të lirë në çdo fund sezoni. Pavarësisht kësaj në klubin katalanas nuk janë aspak të shqetësuar se argjentinasi mund të largohet në janar ose në verën e ardhshme, pasi vendimi për të kaluar te ndonjë skuadër tjetër do të ishte një vendim i ndërlikuar për të ardhmen e tij.
