Argjentina dështon në provën e parë të Botërorit përballë Islandës p[asi ka barazuar 1-1 dhe një pjesë e “fajit” është pikërisht e yllit, Lionel Messi. Ky i fundit nuk arriti të jetë i saktë nga pika e bardhë e penalltisë.
“Albiceleste” u hodh në sulm që në minutat e para dhe në minutën e 19’ arriti të zhbllokojë ndeshjen me Sergio Aguero. Kur të gjithë islandezët mbulonin Messin ishte ylli i Manchester Cityt që gjeti rrugën e rrjetës me një supergol, pas asistimit të Rojo.
Avantazhi i ekipit të Jorge Sampaoli zgjati vetëm katër minuta pasi Alfred Finnbogason barazoi për Islandën.
Kur u mbush një orë lojë, Lionel Messi fitoi një 11-metërsh, por goditja e numrit 10-të u prit nga Hannes Halldorsson. Kjo ishte penalltia e katërt e humbur nga Messi në shtatë ekzekutimet e fundit, në nivel klubesh dhe përfaqësuesesh.
Argjentina e dominoi ndeshjen në minutat e fundit, por me një shpirt të madh gare, sakrificë, pritjet e Halldorsson dhe shumë fat, Islanda mori pikën e parë në ndeshjen e parë në një Kupë të Botës.
