Danilo verën që lamë pas nënshkroi kalimin nga real Madrid, tek Manchester City. Ai është shprehur se është duke kaluar një moment të mirë tek cityzen dhe se ka marrëdhënie të mira me teknikun Guardiola. Por braziliani i ka befasuar të gjithë kur është shprehur se mirëpret ardhjen e Missit në ekip dhe se ai është lojtari më i mirë në botë. Ai ka luajtur dy vite krah Cristiano Ronaldos dhe ka pasur marrëdhënie mjaft të mira me portugezin, por që bindja e tij mbetet që Messi është numri një.
“Ne kemi një skuadër shumë të mirë, por gjithçka mund të përmirësohet. Messi është lojtari më i mirë. Sigurisht, do doja të luaja me të, sepse ai është më i miri”, tha ai për “Marca”. Braziliani gjithsesi ka mbresa të mira nga eksperienca në Madrid dhe vazhdon të ketë raporte mjaft të mira me lojtarët dhe stafin drejtues. Ai vlerëson maksimalisht Zidane, i cili e ka mbështetur gjithmonë në fushën e lojës dhe jashtë saj. Por të njëjtën ngrohtësi ka gjetur edhe tek Manchester City me Guardiolën, të cilin braziliani e vlerëson maksimalisht. “Zidane dhe Guardiola janë dy trajnerë të shkëlqyer. Unë kam pasur një marrëdhënie shumë të mirë me Zidanen gjatë dy viteve që kam qenë në Madrid, ndërsa tani kam një raport shumë të mirë edhe me Guardiolën”, u shpreh Danilo.
