Ambasadori i Bashkimit Evropian në Tiranë, Luigi Soreca, edhe një herë tjetër ka ripërsëritur se heqja dorë e opozitës nga mandatet minon procesin e integrimit të Shqipërisë. Në në deklaratë të shkurtër për mediat nga Pallati i Kongreseve, Soreca e ka vënë theksin tek dialogu mes palëve, dhe se djegia e mandateve është kundër demokracisë.
Duket se beteja politike mes opozitës dhe shumicës qeverisëse në Shqipëri nuk ka të ndalur. Ndërkohë që opozita njofton planet për protesta të përjavshme, duke mobilizuar strukturat, PS nga ana tjetër nuk qëndron në heshtje.
Këto tentativa nga ana e opozitës dhe mazhorancës janë përkthyer në një ‘luftë’ në sytë e ndërkombëtarëve. Ambasadori i BE trumbetoi që qeveria të vijojë punën për përmbushjen e detyrimeve, e po kështu, që edhe opozita të kthehet në Kuvend. Pas nuk ka lënë edhe protestat, duke bërë thirrje për shmangie të dhunës.
“Ne presim si qeveria dhe opozita të angazhohen në një diskutim konstruktiv. Qeveria duhet të punojë për të përmbushur detyrimiet, përfshirë këtu dhe kriteret për anëtarësimim në BE. Opozita duhet të reagojë pa dhunë. Ne e kemi bërë këtë thirrje.
Ky vend duhet të jetë Parlamenti. Opozita nuk duhet të bojkotojë Parlamentin. Javën e fundit thashë se vendimi për të djegur mandatet mund të kishte krijuar një paqartësi në vend. Do duhet kohë përpara se të vijë kjo siguri nga KQZ.
Ja përse thamë se djegia e madateve do të ishte kundërprodhuese për demokracinë. Mirëpresim që çdo protestë të jetë paqësore, dhe jo me dhunë, pasi kjo nuk është gjë e mirë për reputacionin e Shqipërisë.
Komisioni i Parlamentit Europian për çështjet e jashtme do të jetë në Tiranë. Do të bëjnë një vlerësim përpara zgjedhjeve të qershorit. Ata do takohen me përfaqësues të maxhorancës, opozitës. Do të ketë një konferencë për shtyp të enjten paradite. Mendoj se kjo vizitë është e rëndësishme, ata kanë luajtur një rol të rëndësishëm edhe në të shkuarën.
Ata do t’i dëgjojnë të dyja palët, dhe ne do të bëjmë një vlerësim përpara zgjedhjeve të qershorit“, deklaroi Soreca.
