Ambasada Amerikane në Tiranë ka dhënë një mesazh duke iu referuar përvjetorit të 10-të të Shqipërisë në NATO.
Në një postim në faqen zyrtare, ky mesazh nis me fjalët e presidentit amerikan George W. Bush gjatë vizitës së tij historike në Tiranë në vitin 2007. Më tej, ambasada shkruan se edhe sot Shqipëria mund të mbështetet tek SHBA, ashtu siç SHBA mund të mbështeten te Shqipëria.
Postimi i plotë:
“Shqipëria është një mike e besuar dhe një aleate e fortë. Shpresoj se vizita e sotme do të dërgojë tek populli shqiptar mesazhin se ju mund të mbështeteni tek Amerika, ashtu si Amerika mund të mbështetet tek ju, për të punuar fort për të përhapur lirinë dhe, si rrjedhojë, paqen,” tha ish-Presidenti i Shteteve të Bashkuara George W. Bush gjatë vizitës së tij historike në Tiranë në 2007, teksa Shqipëria përgatitej të hynte në NATO.
Ndërsa Shqipëria feston 10 vjet anëtarësim në NATO, ushtarët amerikanë marshuan me krenari përkrah Forcave të Armatosura të Shqipërisë, duke i qëndruar këtij premtimi. Edhe sot, Shqipëria mund të mbështetet tek Shtetet e Bashkuara, ashtu si Shtetet e Bashkuara mund të mbështeten tek Shqipëria. Gëzuar përvjetorin e 10-të, Shqipëri!
