Nga Joshua Posaner, “Politico.eu”/Angela dhe Vladimir dhanë një tjetër shfaqje – me Donald Trumpin që vëzhgon në distancë – dhe u larguan nga takimi i mbrëmjes së tyre të së shtunës, duke dhënë deklarata bashkëpunuese.
Presidenti rus, Vladimir Putin, fluturoi në Berlin orët e vona të së shtunës për të forcuar një marrëdhënie aktualisht të brishtë me kancelaren gjermane Angela Merkel, dhe duke hedhur poshtë mosmarrëveshjen për një zgjerim të diskutueshëm të gazsjellësit “Nord Stream”.
Atmosfera ishte sigurisht më pak e nxehtë se sa në të kaluarën, dhe liderët rikonfirmuan – duke injoruar presionin amerikan – angazhimin e tyre ndaj marrëveshjeve energjetike. Takimi mund të mos ketë pasur bujën e samitit Putinit-Trump muajin e kaluar në Helsinki – një takim që Trump e quajti “të jashtëzakonshëm” në një video të postuar të shtunën në Twitter – por presidenti amerikan ishte shumë i pranishëm në këto bisedime.
Në konferencën për shtyp në Helsinki me udhëheqësin rus, Trump u tha mediave: “Nuk jam i sigurtë nëse zgjerimi i tubacionit Nord Stream, është apo jo në interesin më të mirë të Gjermanisë. Ky është një vendim që ata e kanë marrë. Ne do të garojmë me Rusinë për të siguruar furnizimin me gaz”.
Vetëm disa ditë më parë, në samitin e NATO-s në Bruksel, ai kishte thënë se Gjermania “është e kontrolluar plotësisht nga Rusia”, si pjesë e një përpjekjeje të dukshme, për shumë veshë gjermanë nga presidenti i SHBA-së, për t’i detyruar gjermanët të blinin më shumë gaz natyror nga Amerika.
Por nëse Trump shpresonte të minonte projektin “Nord Stream 2”, Putin dhe Merkel ishin të etur për të treguar se ai është ende në lojë. “Gjermania është një nga partnerët kryesorë ekonomikë të vendit tone”- tha Putin, duke e ilustruar këtë me statistikat mbi tregtisë dypalëshe në rritje dhe numrin e lartë të kompanive gjermane që veprojnë në Rusi.
Të dy mund të flasin gjuhën e njëri-tjetrit – Putini flet rrjedhshëm në gjermanisht për shkak të kohës së kaluar si agjent sekret në Gjermaninë Lindore, ndërsa Merkel e mësoi rusishten në shkollë – por në çështjet ndërkombëtare ata qëndrojnë në pozita të ndryshme.
Ata shmangnin adresimin e këtyre dallimeve, duke qenë se ishin ende nën sipërfaqe. Në komentet e para samitit, të bëra pa pranuar pyetje nga media, Merkel theksoi përgjegjësinë globale, ndërsa Putin bashkëpunimin ekonomik – veçanërisht në furnizimin me gaz.
Merkel iu drejtua një spektri çështjesh ndërkombëtare në komentet e saj të shkurtra, përfshirë perspektivat e një misioni të OKB-së në Ukrainë, dhe një roli të zgjeruar të Berlinit në zgjidhjen e mosmarrëveshjes, konfliktin në Jemen dhe rolin e Iranit në çështjet ndërkombëtare.
Të dy ata ishin takuan për bisedime dypalëshe në Soçi në maj të këtij viti, dhe nuk ishin takuan në Gjermani, që kur Rusia aneksoi Krimenë në vitin 2014. Thelbi i bisedimeve të mbajtura në kështjellën e shekullit XVIII në Meseberg, rreth 60 kilometra në veri të Berlinit, ishin planet për të dyfishuar kapacitetin e tubacionit “Nord Stream”, me një linjë të tretë dhe të katërt vitin e ardhshëm.
Kjo ndodh me gjithë frikën, se lidhja nëntokësore do të përdoret për të anashkaluar dhe për të dëmtuar ekonomikisht dhe strategjikisht, shtetet e tranzitit në Evropën Qendrore dhe Lindore.
Nëse nis ndërtimi i Nord Stream 2, Ukraina duhet të luajë një rol në transitin e gazit në Evropë”- tha Merkel. Gjermania ka mbështetur projektin e gazsjellësit, pavarësisht kritikave se ai do të përdoret si një armë për nxjerrjen e lëshimeve politike nga vendet e varura nga importi.
Ukraina do të humbasë miliona euro në tarifat e transitit të gazit, nëse rrjeti i shpërndarjes së gazit në epokën sovjetike nuk përdoret më për të rezervuar rezervat e gazit për konsumatorët në të gjithë Evropën Qendrore, dhe një konflikt ligjor afatgjatë mbi kushtet e dërgesave ruse përmes Ukrainës, do të mbetet i pazgjidhur.
Putin nuk përjashtoi vazhdimin e furnizimit me gaz përmes Ukrainës, por tha se tubacioni “Nord Stream” është një projekt ekskluzivisht ekonomik, i projektuar për të “minimizuar rrezikun e transitit”, për një sasi në rritje të gazit të dërguar në Gjermani çdo vit.
“Unë do të doja të theksoja, se gjëja kryesore është se tranziti ukrainas – i cili është tradicional – i plotëson kërkesat ekonomike”- tha Putin. Kompania ruse Gazprom, i dorëzoi 53 miliardë metra kub gaz Gjermanisë në vitin 2017, duke u rritur me 13 për qind në vitin e kaluar, tha Putin në Meseberg.
“Nord Stream 2”, do të mundësojë rritjen e kapacitetit me 110 miliardë metra kub çdo vit, duke e lejuar Rusinë të shndërrojë rrjetin e Gjermanisë në një shpërndarës kryesor për Evropën Qendrore.
Putin mbërriti në bisedime 30 minuta me vonesë, pas një pranie të diskutueshme në dasmën e Ministres të Jashtme austriake, Karin Kneisel, në të cilën udhëheqësi rus u fotografua duke vallëzuar me nusen në ceremoninë e organizuar në rajonin austriak Steiermarkit.
Kancelarja gjermane, kishte ulur pritshmëritë e saj për takimin, duke e përshkruar atë si një “takim pune” me “asnjë rezultat specifik”. Mbi Sirinë, të dy udhëheqësit ranë dakord se nevojiten masa për të forcuar reagimin humanitar ndaj konfliktit 7-vjeçar.
“Ne duhet të shmangim një katastrofë humanitare. Kemi vënë re se luftëtarët xhihadistë po tërhiqen, por siguria natyrisht nuk është vendosur”- tha ajo. “Është e rëndësishme të forcohet ndihma humanitare në Siri. Dhe e rëndësishme të mbështesim ato zona, në të cilat refugjatët mund të rikthehen nga jashtë”- theksoi Putin.
Jashtë derës së kështjellës së Meseberg, një grup njerëzish protestuan kundër rolit të Rusisë në konfliktet ndërkombëtare. Por Merkel premtoi të merrte një qëndrim të drejtë në bisedime. “Ne do të diskutojmë mbi çështjet e rëndësishme të të drejtave të njeriut. “Unë besoj se çështjet e diskutueshme mund të zgjidhen përmes dialogut”- tha kancelarja gjermane.
PËRSHTATI TIRANA TODAY
