Pas Hakimit, një largim tjetër mund të jetë ai i Stefan de Vrij nga Interi. “Neraxurrët” duhet të mbledhin shuma të konsiderueshme për të kapërcyer vështirësitë ekonomike dhe për të financuar fushatën e merkatos së verës. Kështu, për disa kohë po qarkullojnë zëra rreth largimit të mundshëm të Lautaro-s apo Lukakut përballë ofertave të majme. Sidoqoftë, informacioni i fundit flet për mbrojtësin rreth një lamtumire të mundshme.
Mino Raiola, raporton ‘Tuttosport’, po punon që ta dërgojë de Vrij në Premier League. Agjenti i fuqishëm ka folur për klientin e tij me më shumë se një drejtor sportiv për të ‘hetuar’ tregun e mundshëm që ai mund të ketë në Angli. Interi, nga ana tjetër, është i vetëdijshëm se nëse shet një si De Vrij do të mund të refuzojë çdo ofertë për Lautaron dhe Lukakun në rast shitjeje.
