Pas largimit të brazilianit Ze Maria, Tirana ka zyrtarizuar Ardian Memën si kreun e pankinës bardheblu. Ditën e sotme është firmosur edhe kontrata mes dy palëve edhe pse puna në kompleksin “Skënder Halili” ka filluar disa ditë më parë. Mema do të nënshkruajë një kontratë 1-vjeçare me drejtuesit bardheblu me të drejtë rinovimi dhe për një vit tjetër. Ecuria e skuadrës dhe pozicioni në fund të kampionatit do të vendosin të ardhmen e tij, sigurisht, nëse do të përballojë deri në fund të sezonit.
“Ardian Mema ka firmosur sot zyrtarisht kontratën që e rikthen në shtëpi si bardheblu. Tekniku ka nënshkruar sot një marrëveshje 1-vjeçare në praninë e presidentit Refik Halili. Në këtë kontratë është parashikuar një opsion rinovimi për sezonin e ardhshëm. Mema është ish-futbollist dhe ish-trajner i Tiranës dhe rikthimi në shtëpi është një premtim për vazhdimësinë e këtij sezoni”,–shkruan klubi bardheblu.
Nga kompleksi stërvitor Skënder Halili, Mema këtë të hënë foli gjithashtu për herë të parë për mediat si timonieri i ri i Tiranës, duke nënvizuar se nuk ishte 100% i bindur për zgjedhjen e tij.
“Tirana është klub i madh dhe unë kam dalë nga ky klub. Me thënë të drejtën e prita pak me skepticizëm për shkak se situata që po kalonte nuk ishte fort e këndshme. Të them të drejtën është shumë kalendar i vështirë. Duhet të fus frymën e grupit për t’iu rikthyer rezultateve të mira. Shpresoj që ekipi të jetë në një atmosferë më të mirë se periudha që po kalon.”
Për ndeshjen e radhës ndaj ish skuadrës së tij Flamurtarit që do të jetë e para për të në stolin e bardhbluve Mema shtoi.
“Flamurtari është një ekip i mirë, sepse ka trajner Ilir Dajën. Unë kam punuar gjatë me të, është trajneri më i mirë në Shqipëri. I përgatit mirë ndeshjet. Unë e njoh gjendjen atje, dhe do e përgatis mirë këtë ndeshje. Ne nuk shkojmë të dorëzuar në Vlorë, shkojmë për rezultat pozitiv.”
