Policia turke ka arrestuar 70 persona të dyshuar si anëtarë të ISIS‑it. Lajmi është bërë i ditur nga kanalet zyrtare televizive mëngjesin e sotëm.
Agjencia e lajmeve “Anadolu” raportoi se njësia policore kundër terrorizmit zhvilloi aksione dhe operacione të inteligjencës në provincat qendrore, më saktësisht në Ankara, Kayseri, Adana dhe Batman.
Rreth 400 policë morën pjesë në aksionin që filloi në orën 5 të mëngjesit vetëm në provincën Batman. Ata i arrestuan 22 persona në disa lokacione. Përpos arrestimeve, policia sekuestroi armë, municion dhe dokumente.
Vetëm në Ankara u arrestuan 30 shtetas irakianë, dy sirianë dhe një maroken. Nëntë qytetarë irakianë u arrestuan në Kayseri, ndërsa katër sirianë dhe dy irakianë të tjerë u arrestuan në Adana, shkruan “Reuters”.
