Presidenti i SHBA, Joe Biden dhe administrata e tij po bëjnë presion të ashpër ndaj qeverisë Greke për të njohur pavarësinë e Kosovës në ditët në vijim.
Sipas medias serbe Investi Online, është shumë e rëndësishme për Uashingtonin që Athina të njohë pavarësinë e Kosovës përpara vazhdimit të dialogut midis Beogradit dhe Prishtinës në Bruksel, i cili është planifikuar për në mes të qershorit.
Me këtë lëvizje, synohet që të “dobësohet” pozicioni i Serbisë me “njohjen greke” dhe të tregohet se “pavarësia e Kosovës” është një punë e mbaruar.
Ekspertët paralajmërojnë gjithashtu se në rast se Greqia i nënshtrohet presionit të SHBA dhe e njeh Kosovën si një shtet të pavarur, kjo do të nënkuptojë shkelje të marrëveshjes në Uashington, pas së cilës Serbia mund dhe duhet të fillojë një fushatë çnjohjeje.
Ky zhvillim u konfirmua indirekt ditën e djeshme nga Presidenti i Serbisë, Aleksandar Vuçiç, i cili tha se kishte “frikë se llojet e ndryshme të presionit politik mbi çështjen e Kosovës do të ndiqnin në periudhën e ardhshme”.
”Kam marrë disa njoftime aspak të këndshme në lidhje me Kosovën. Ekzistojnë lloje të ndryshme presioni rreth krahinës sonë. Por ne do të luftojmë deri në fund, dorëzimi nuk është kurrë një opsion për ne”, u shpreh Vuçiç.
