Shkarkimi i ambasadores shqiptare në Athinë, Ardiana Hobdari dhe trupit diplomatik, nuk ka kaluar pa komente nga mediat greke.
Protothema shkruan se shkarkimi ka ardhur për shkak se ajo dhe konsulli i përgjithshëm i Janinës, Pervin Gjikuria janë të përfshirë në vjedhjen e 100 pasaportave shqiptare.
Media greke shkruan se ka informacione se Hobdari është e përfshirë në ngjarjen e natës së 13 shkurtit në Athinë. Brenda kësaj nate, nga makina e konsullit të Janinës u vodhën 100 pasaporta, nga 300 që ndodheshin brenda në mjet.
“Ambasadorja shqiptare në Athinë dhe Konsulli u shkarkuan nga puna pasi vodhën 100 pasaporta nga një makinë e trupit diplomatik që po transportoheshin në ambasadë.
Historia e çuditshme filloi pikërisht me faktin se deri vonë tranferimi i pasaportave nga Tirana në Athinë bëhej me një mision të thjeshtë dhe jo përmes çantave diplomatike si zakonisht. Automjeti, sipas Ministrisë së Punëve të Jashtme të Shqipërisë, i përket Gjikurisë.
Në të njëjtën njoftim thuhet se konsulli në fjalë kishte marrë përsipër detyrën e transportimit të pasaportave në Athinë dhe dorëzimin e tyre në ambasadën shqiptare.
Vjedhja ndodhi në 13 shkurt, vonë natën, në Thesio, ku ishte automjeti i konsullit shqiptar që u vandalizua. Policia Greke u informua siç duhet për ngjarjen”, thuhet në artikullin e medias greke.
