Mërgim Mavraj është duke bërë një pauzë në karrierën e tij, pasi është përjashtuar nga ekipi i parë i Hamburgut në Bundesligën Gjermane dhe është dërguar në ekipin e dytë. Por qendërmbrojtësi i kombëtares shqiptare nuk ka pranuar të stërvitet pasi trajneri i ekipit nuk ka licencën e duhur nga UEFA për të stërvitur profesionistë. Eksperienca e Mavrajt tek ekipi gjerman ka përfunduar dhe në fundin e sezonit pritet që ai të largohet dhe të kërkojë një ekip të ri.
Trajneri Christian Titz deklaroi se e kishte pezulluar Mavrajn për gjendjen e tij fizike dhe se nuk e binde në formën që kishte treguar. Pas këtij prononcimi nuk kemi pasur asnjë sqarim për këtë situatë, pasi edhe shtatlarti kuqezi nuk ka pranuar të flasë as për mediat gjermane e shqiptare.
Por mediat pranë klubit të Hamburgut kanë zbuluar se trajneri Titz nuk ka dhënë arsyet e vërteta të përjashtimit të Mavrajt dhe brazilianit Walace nga ekipi i parë. Zbulohet se të dy futbollistët duke parë kalvarin e rezultateve negative kanë dalë kundër trajnerit duke u treguar të sinqertë dhe e kanë etiketuar si të paaftë për të shpëtuar ekipin nga rënia nga Bundesliga. 31-vjeçari shqiptar dhe 23-vjeçari brazilian e kanë shprehur diçka të tillë dhe te drejtuesit e klubit dhe aty ka nisur i gjithë problemi me të dy.
Mavraj ka luajtur këtë sezon 17 ndeshje me ekipin gjerman, të gjitha si titullar, ndërsa ka qëndruar 6 herë në stol. Ai nuk po grumbullohet më nga trajneri i HSV-së, pasi rrugët janë ndarë mes tyre. Ekipi i HSV-së po kalon sezonin më të keq në gjithë historinë, pasi mund të bjerë nga Bundesliga për herë të parë. Në fakt, duket se nuk ka asnjë shpëtim për të.
