Çështja se Shqipëria është “hambari” i drogës në rajon, ka marrë jo vetëm vëmendjen e medieve në vend por edhe atyre ndërkombëtare. Së fundmi në një artikull të publikuar nga portali francez rfi.fr, shkruan se enigmë mbetet tek fakti nëse kryeministri Rama do mund të dalë dot nga lidhjet me krimin.
“Gjithë pyetja është nëse kryeministri i shkëlqyer Edi Rama është ende në gjendje të shkëpusë veten nga përqafimi i rrezikshëm i qarqeve kriminale dhe zotëve të drogës”, – shkruhet në artikull.
Ndërsa më tej ka komentuar faktin se Shtetet e Bashkuara dhe vendet evropiane kanë filluar të ushtrojnë presion në rritje ndaj qeverisë së Edi Ramës.
Por, në shkrim nuk lihej jashtë vëmendjes dhe çështja e ish-ministrit të Brendshëm Saimir Tahiri.
“Njëzet deputetë socialistë janë dënuar në të kaluarën për trafik droge ose janë të lidhur drejtpërdrejt me të. Në fund të tetorit, kushëriri i ish-Ministrit të Brendshëm, Saimir Tahiri, u arrestua në Sicili. Prokuroria shqiptare po kërkon arrestimin e ish-ministrit, por Edi Rama dhe Partia Socialiste janë kundër saj dhe kanë refuzuar të heqin dorë nga imuniteti i tij parlamentar”,- shkruhet me tej.
Gjithashtu i ka kushtuar vëmendje dhe raporteve dhe deklaratave të ndërkombëtarëve lidhur me situatën në të cilën ndodhet Shqipëria, e rrethuar nga klanet mafioze.
https://tiranatoday.com/eshte-shqiperia-duke-u-bere-narko-shtet-ne-zemer-te-evropes/
