Kryetarja e LSI-së, Monika Kryemadhi i është përgjigjur eurodeputetit gjerman, Knur Fleckenstein, i cili tha se ishte zhgënjyer nga ajo.
Në një reagim të shkurtër në Facebook, Kryemadhi nënkupton se nuk ka ndërmend të zbrapset, pavarësisht nga thirrjet e delegacionit të PE-së, për të vijuar betejën në parlament.
“Shqipëria është shtëpia e shqiptarëve. Ky është misioni ynë, asnjë hap pas”, shkruan Kryemadhi në Facebook.
Sot, gjatë konferencës së delegacionit të PE-së, Fleckenstein tha se ishte habitur dhe zhgënjyer nga kryetarja e LSI-së, në takimin që patën me të.
“U çudita dhe u zhgënjeva shumë nga kryetarja e LSI, ajo tha vetëm një fjali në fund të takimit. Ajo the se tashmë “ata e kanë marrë vendimin e tyre, në Shqipëri ka nevojë për ndryshim dhe nëse evropianët nuk e kuptojnë këtë, ky nuk është problemi i tyre.” Kjo më habiti. Doja të shtoja se ata që organizojnë protestat, duhet të kujdesen që të mos ketë dhunë”, tha ndër të tjera eurodeputeti gjerman./ Tirana Today
