Kreu i Partisë Demokratike, Lulzim Basha u paraqit mëngjesin e sotëm në Prokurorinë e Tiranës, pasi ishte thirrur për dosjen e lobimit në SHBA, ku dyshohet se ka ndikim rus.
Basha pasi ka dalë nga prokuroria është shprehur se kjo është një akuzë që nuk ka asnjë provë dhe se është montuar në zyrën e Edi Ramës për qëllimet e tij.
“Për ju dhe për qytetaret, për skandalet që kanë plasur do flasim nesër. Prokuroria nuk ka asnjë fakt shtesë që nga 25 maji kur unë isha këtu. Kjo për një arsye të thjeshtë, pasi kjo akuzë është montuar në zyrën e Edi Ramës, për Edi Ramën.
U njoha me akuzën që nuk është akuzë, nuk ka asnjë transaksion apo dokument të parregullt, nuk ka asnjë rus,k është akuzë e montuar për qëllimet e Ramës,” u shpreh Basha.
Kryedemokrati theksoi se kjo është një dosje që nuk ka asnjë provë, por përdoret nga qeveria sa herë që plasin skandalet e mëdha. Kjo ishte hera e 5 që kreu i PD thirret në prokurori dhe sipas tij thirrej sa herë kishte skandale.
“Dosjen nuk e kishin gati pasi nuk kanë dosje, nuk kanë asnjë provë asnjë fakt. Kam qenë 5 herë, kur doli skandali “Geron Xhafa”, “Toyota Yaris” etj., sa herë plasin skandalet që lidhin qeverinë me krimin, këta hapin një dosje që nuk ka asnjë provë.
Nuk erdha atë ditë pasi nuk ishte një kërkesë e rregullt dhe kërkonin që ta përdornin si shpërqendrim për skandalet që publikoi Bild. Në Prokurori ka shumë njerëz të frikësuar, por unë nuk jam i frikësuar nga kjo që po ndodh,” deklaroi Basha.
