Pas tërmetit të madh të 26 nëntorit, qindra lëkundje të tjera janë ndjerë në vend duke krijuar mjaft panik te qytetarët.
Ndërkohë mjaft prej banorëve të prekur nga tërmeti 6.4 ballë janë akomoduar në hotele të ndryshme. Zonat më të prekura janë qarqet e Tiranës dhe Durrësit, ku janë shënuar edhe viktima si pasojë e shembjeve të pallateve. E rënduar gjendja është shfaqur edhe në lagjen nr.15 në Spitallë, ku disa banesa janë bërë të pabanueshme.
“Ishim në shtëpi. Jetoj në pallat në lagjen nr.15 në Spitallë. U trembëm shumë. Ishte ngjarje e jashtëzakonshme. Sapo mbaroi tërmeti dolëm jashtë. Më ra një copë beton në kokë, më çuan me urgjencë në spital. Shtëpia është bërë e pabanuar. E kam kaluar natën në çadër. Sot do të na çojnë në hotel”, tha për Neës24 një banore e zonës.
Ndërkohë një tjetër person rrëfen se shtëpia e tij është shembur nga tërmeti 5.1 ballë që u regjistrua paraditen e sotme. Ai tregon se i është ofruar një çadër, por është i sëmurë dhe nuk mund të strehohet aty.
