Pasi ka dëshmuar në lidhje me padinë e bërë ndaj kreut të KED, Ardian Dvorani, Meta iu përgjigj interesit të mediave, ku tha se dha sqarime në lidhje me vijimin e provave. Me një mesazh ndaj Prokurorisë, Meta kërkoi publikisht që ky institucion të bëjë punën e tij, e mbi të gjitha të mos jetë nën presionin politik.
Kreu i Shtetit, Ilir Meta, i mëshoi fort faktit se të gjitha provat e depozituara deri më tani, janë të mjaftueshme që Prokuroria të veprojë ndaj Ardian Dvoranit. Duke folur sërish me ‘qetësi e dashuri’, presidenti Meta tha se do të bashkëpunojë me Prokurorinë. “Mund t’ju them se ne do të vijojmë të komunikojmë me qetësi dhe arsyetim. Ne duam të mbrojmë Kushtetutën”, tha ndër të tjera ai.
“Nuk mund të largohesha pa respektuar vëmendjen tuaj. Me pak fjalë, mund t’ju them se jam këtu në përgjigje të ftesës së Prokurorisë, pas kallëzimit që kam bërë për shtetasin Ardian Dvoanin, për dy vepra penale që janë bërë me dashje nga ana e tij.
Kemi vënë pronat dhe dokumentet së bashku kallëzimin penal. Rasti është tmerrësisht flagrant, shpresoj që Prokuroria të bëjë punën dhe të mos jetë nën presionin politik. Kushtetuta e thotë shumë qartë, që është Kushtetuta pika më e lartë.
Lidhur me këtë çështje, që bëhet fjalë për Gjykatën Kushtetuese, sepse garanton të drejtat kushtetuese të qytetarëve, në këtë drejtim dua t’u siguroj shqiptarëve se Meta ka ecur sipas ligjit.
Të gjitha provat e depozituara deri më tani, janë të mjaftueshme që Prokuroria të veprojë ndaj shtetasit Ardian Dvoranit. Prokuroria ka pasur edhe çështje të tjera, por kjo është një çështje që askush nuk mund t’i shmanget.
Ne jemi të qetë dhe të duruar, dhe do të bashkëpunojmë me Prokurorinë. Ky ishte një rast tepër flagrant, dhe vendi ndodhet në një situatë të jashtëzakonshme. Mund t’ju them se ne do të vijojmë të komunikojmë me qetësi dhe arsyetim. Ne duam të mbrojmë Kushtetutën. Sapo të kthehem në zyrë, do t’i autorizoj Blushit që të nxjerrë spotin e parë për çështjen në fjalë”, u shpreh Meta.
