Seanca e jashtëzakonshme e Kuvendit ka nisur me debate të ashpra, lidhur me përplasjen Kuvend-President.
Në lidhje me këtë çështje ka folur edhe deputeti i opozitës, Lefter Maliqi. Duke përdorur tone të ashpra dhe herë herë me doza emocionale, ai i është drejtuar shqiptarëve dhe ka kërkuar prej tyre që ta ndjekin në “revolucion”.
Duke dashur të zgjojë ndjenjat e fjetura që nga ndryshimet në vitet 90’, Maliqi e ka quajtur një show seancën sot dhe sipas tij, opozita aktuale i shërben qeverisë.
“Janë deputetë të kryetarëve, disa edhe bashkëpunëtorë të sigurimit të shtetit, deputetë që nuk dinë të lexojnë edhe kur fjalimet i kanë të gatshme. Gjithë ky shoë sot këtu është për t’i marr kompetencat Presidentit të Republikës, i vetmi institucion që s’po e marrin dot. Kanë frikë nga zgjedhjet në popull kanë frikë nga vendimi i kushtetueses për anulimin e 30 qershorit. Lartmadhnia mund të genjejë disa, mund të gënjejë edhe shqiptarët për një kohë, po jo për gjithë jetën. kemi vetëm mashtrime, sic bëri me unazë, po lodh studentët, banorët e astirit, artistët se edhe Teatrin do e prishë. i bëj thirrje të gjithëve, të ngrihen në këmbë mos kenë frikë.
E kanabizuan vendin, e kriminalizuan, i morën gjithë institucionet. Me ngjala e me verë iu lutën asokohe Presidentit për pushtet po s’ishin të kënaqur, donin babëzinë vetëm. Disa po i shërbejnë këtij, se jeni të joshur po nëse nuk jeni largohuni. Iu bëj thirrje të gjithë shqiptarëve të ngrihen në këmbë për një revolucion demokratik për të mposhtur diktaturën që këta po instalojnë.” u shpreh Maliqi.
