Italia ka shënuar sot numrin më të vogël të viktimave pas më shumë se dy javësh.
Sipas mediave italiane, në 24 orët e fundit kanë ndërruar jetë 525 njerëz nga koronavirusi, duke e çuar në 15,887 numrin total të vdekjeve.
Ndërkohë janë shënuar 4,591 raste të reja. Kështu numri total i rasteve të infektimit ka shkuar në 128,948, prej të cilave vetëm 91,246 raste janë ende aktive.
Deri më tani në shtetin fqinj janë shëruar 21,815 persona, ndërsa 3,977 pacientë janë në gjendje kritike për jetën.
Ditën e djeshme ishin 681 viktima dhe sot janë 156 viktima më pak. Kjo është dita e dytë radhazi që numri i vdekjeve në Itali bie.
Edhe në Spanjë është evidentuar një rënie e numrit të viktimave brenda 24 orëve. Kujtojmë se Italia dhe Spanja janë 2 shtetet më të prekura nga koronavirusi në Evropë dhe që shënojnë numrin më të madh të vdekjeve në botë.
Ndërkohë numrin më i madh i të infektuarve është në SHBA, e cila numëron plot 323,516 raste të prekurish.
1,245,250 është numri i personave të prekur nga koronavirusi në të gjithë botën, ndërsa numri i viktimave ka shkuar në 67,911.
