Blutë e Lezhës kanë bërë të mundur identifikimin e tre autorëve të dyshuar të ngjarjes së ndodhur në 13 nëntor, ku maskat hynë në një lokal në fshatin Zejmen teksa ishin të armatosur. Shtetasit në fjalë janë Roan Brahimi, 29-vjeç, banues në Fushë-Krujë, Alesio Dobrozi, 31-vjeç si dhe Ramazan Rraja, 28-vjeç, banues në Fushë-Krujë, nipi i deputetit të PS-së, i arrestuar më parë në Holandë për “trafik droge” dhe për “dhunë”.
Ata janë shpallur në kërkim, pasi janë larguar nga Shqipëria. Shtetasit në fjalë, kanë hyrë në bilardo të armatosur për shkak të një konflikti të ndodhur më parë ndërmjet kushëririt të pronarit të lokalit, dhe një shtetasi që është mik i tre autorëve të dyshuar të ngjarjes.
“Këta tre të fundit, më datë 13.11.2021, kanë shkuar të armatosur, në lokalin në pronësi të shtetasit A. K., dhe kanë kërkuar kushëririn e tij, shtetasin L. M.(K), (i cili më herët ishte konfliktuar me shtetasin Gj. J., mik i tre autorëve të dyshuar). Shtetasi L. M.(K), në momentet e ngjarjes nuk ka qenë në ambientet e lokalit”, thuhet në njoftim.
Po në vijim të veprimeve, menjëherë pas publikimit të videos në media dhe rrjetet sociale, nga shërbimet e policisë është bërë i mundur identifikimi i të gjithë personave që ndodheshin në lokal, të cilët në vijim të veprimeve hetimore janë proceduar penalisht për veprën penale “Moskallëzim krimi”.
Materialet hetimore u referuan në Prokurorinë e Rrethit Gjyqësor Lezhë, për veprime të mëtejshme, për veprat penale “Vrasja” e mbetur në tentativë, “Armëmbajtja pa leje” dhe “Kanosja”, e mbetur në tentativë, të kryera në bashkëpunim.
