Kryetarja e LSI-së, Monika Kryemadhi, akuzon drejtorin e Komunikimit me Median në Kryeministri, Endri Fugën, se i ka fshirë asaj videot dhe intervistat që ka dhënë në televizione nga rrjetet sociale.
Në një intervistë për Report Tv, Kryemadhi hodhi akuza edhe ndaj Partisë Socialiste, duke thënë se degët e tyre në qarqe drejtohen nga grupe kriminale.
“Ne një video na del në televizion dhe kompani e cila është e licensuar nga Endri Fuga na e heq të drejtën, fytyrën time, zërin tim, paska ai të drejtën e autorit të dhënieve të mia se ç’them unë në televizionin tuaj dhe nuk e paskam unë. Ma heq mua nga Facebooku dhe rrjetet sociale. Me ç’të drejtë, ky sepse nuk do që të shpërndahet një video e një opozitari. Ama kur janë videot apo intervistat e qeveritarëve apo e njerëzve të Edi Ramës nuk paska ai të drejtën e autorit.
Që të jemi të sinqertë, socialistët e vërtetë, sepse ka dy tre grupime sot në Partinë Socialiste dhe nuk më takon po them që t’i bëj analizën asaj. Socialistët e vërtetë ndihen jo vetëm të zhgënjyer, por edhe të përdorur. Kur një socialist, i cili ka mbi 30 vjet që punon dhe voton për Partinë Socialiste, i kërkohet nga zyrat e shtetit 25 mijë euro bakshish për të marrë një leje ndërtimi apo për të marrë një zhvillim, është shumë e rëndë. Ndihet shumë i fyer, se hajde kur ja kërkon dikush i një partie tjetër, se ne u mësuam me këtë metodë pune. Por pastaj Rilindja, që vjen pa asnjë lloj kontributi, pa asnjë lloj background-i politik, pa asnjë lloj po themi respekti ndaj historisë së Partisë Socialiste, sigurisht që ata nuk ndjejnë asnjë lloj dhimbjeje. Do ta mjelin. Siç milet lopa, dhe pastaj do të marrin qumështin dhe do të ikin e nuk do e kthejnë më kokën pas. Pastaj janë grupet kriminale të cilët po e përdorin partinë Socialiste si një mburojë dhe një trampolinë për të implementuar paratë e tyre në ekonominë shqiptare dhe për t’i legalizuar ato. Pra janë 3 grupe, që për hir të së vërtetës do ta kenë shumë të vështirë që të mbijetojnë me njëri tjetrin”, deklaroi Kryemadhi.
