Zv/Kryeministri Arben Ahmetaj, pas mbledhjes së Këshillit të Ministrave është pyetur nga gazetarët se me çfarë ka shkuar në punë, për të kursyer karburant përballë një krize të tillë globale. Ai tha se qeveria është e përgatitur që hap pas hapi të marrë masa, dhe se kemi të bëjmë me një krizë globale që e ka gjenezën në Ukrainë.
“Nëse keni interes çfarë bëjnë qytetarët, dua të ndaj me ju që qeveria ka menduar përpara disa muajsh për ato paketa që sot janë publike në funksion.
Shqipëria e ka inflacionin 6.2% më pak se i gjithë rajoni, kjo ka të bëjë me subvencionimin, me mbështetjen që i ka dhënë qeveria në paketën e të ardhurave. Bosnja është 13. Asnjë nga vendet nuk i afrohet 6.2. Është një krizë globale fatkeqësisht, që e ka gjenezën në Ukrainë në invazionin rus.
Në këtë fazë ku gjithë kriza ndërkombëtare e energjisë dhe jo vetëm e preson tregun, ne jemi treg i hapur dhe kemi konseguencat e asaj krize dhe është një krizë që nuk është se pushon sot, që nuk i dihet fundi. Qeveria është e përgatitur që hap pas hapi të marrë masa”, tha Ahmetaj.
Ai është përgjigjur se kur do të ndalen së funksionuari bordet për rregullimin e çmimeve. Ahmetaj tha se do të vijojnë që të funksionojnë, pasi qeveria do të përdorë të gjitha instrumentet që të frenojë abuzimin me çmimet.
‘Sot morëm një seri detyrash. Janë mbi 20 e ca detyra që dha për kabinetin në raportin me hartimin e politikave për përballimin e krizës. Është një krizë e shkaktuar nga njeriu. Do të përdorim të gjitha instrumentet, edhe inovative, që të frenojmë rritjen abuzive të çmimeve. Çdo instrument që do të frenojë abuzimin me çmimet, do të fillojë të funksionojë. Do të zbatojmë të gjitha mekanizmat për lehtësim”, u shpreh Ahmetaj.
258 Lekë për litër është çmimi i naftës në Shqipëri që prej ditës së mërkurë, çmimi më i lartë i vendosur ndonjëherë në vendin tonë që prej krijimit të Bordit të Transparencës, i ngritur për të mos lejuar abuzimet me çmimin e karburantit. Sipas burimeve nga tregu, shtrenjtimi lidhet me rritjen në bursat ndërkombëtare.
