Nga: Ervis Iljazaj
Pas mos hapjes së negociatave me Bashkimin Europian, gjë e cila mund të vazhdojë edhe për disa kohë, rruga që do të marrin vëndet e mbetura jashtë rajonin dhe Shqipëria mbetet e pasigurtë. E lënë jashtë portës së Europës dhe si pasojë jashtë influencës së saj, në Ballkanin Perëndimor ekziston rreziku i influencave gjeopolitikë të fuqive të tjera si Rusia, Turqia apo Kina.
Në fakt, për momentin ky mbetet një rrezik potencial, pasi shqiptarët vashdojnë ende të jenë properëndimor në masën më të madhe të tyre. Megjithatë, kujdesi pas mos-hapjes së negociatave duhet të ekzistojë.
Këtë alarm e dha sot në një konferencë për rolin e Amerikës në Ballkanin Perëndmor Leila Moses, përfaqësuese e Ambasadës Amerikane në Tiranë, ku theksoi hapur dhe qartë influencat e mundshme të fuqive të tjera në Ballkan. Për këtë arsye, duket sikur pas kësaj faze që e shikon rajonin larg Bashkimit Europian, Shtetet e Bashkuara duket sikur do të marin një rol edhe më të madh.
Po gjatë kësaj konference për rolin e Shteteve të Bashkuara në Ballkan, kryeministri i Shqipërisë nuk mund të rinte pa e shfrytëzuar rasti për të thënë se: “Europa nuk na do, por ne jemi mirë sepse kemi Amerikën’’.
Duket si një frazë e thënë spontanisht por në të vërtetë nuk është aspak kështu. Thelbi i kësaj fraze është e gjithë teoria që Edi Rama është duke i ofruar opinionit publik shqiptar. Duke bërë Europën përgjegjëse për mos hapjen e negociatave, por duke i qetësuar shqiptarët se kjo gjë nuk është ndonjë dramë sepse kemi gjithmonë Amerikën.
Është e vërtet , shqiptarët me Amerikën janë mirë, por ama të integruar në Bashkimin Europian sigurisht që do të jenë edhe mirë, dhe kjo nuk ka asnjë pikë dyshimi. Kryeministri shqiptar duket i dorëzuar për integrimin e Shqipërisë në Bashkimin Europian, dhe në ktë kuptim nuk do ti thotë shqiptarëve se pas refuzimit të negociatave nuk ekziston rreziku i influencave të fuqive të tjera sepse kemi gjithmonë Amerikën. Mirëpo, vetëm disa kohë më parë, madje sa herë që afrohesh momenti për të vendosur për negociatat me Shqipërinë Edi Rama “kërcënonte’’ Bashkimin Europian për të tilla influenca, edhe pse Amerika ka qenë gjithë kohës këtu aleate e palëkundur e shqiptarëve.
Për këtë arsye, për thjesht justifikimin e dështimeve të qeverisë në procesin e negociatave, po krijohet një frymë antieuropiane në Shqipëri, duke i fryrë në disa raste idesë se Europa nuk na do sepse është antishqiptare, islamofobe, apo ide të tjera absurde si këto. Ky është rreziku më i madh që i kanoset Shqipërisë në të ardhmen, krijimi i idesë se Europa na e ka me hile dhe nuk na do në shtëpinë e saj të përbashkët.
Ështe e qartë se Shqipëria me aleancën me Shtetet e Bashkuara gjendet mirë dhe e sigurtë, por kjo aleancë nuk ka kuptim nëse nk integrohemi në Bashkimin Europian. Shqipëria do të jetë mirë vetëm nëse bëhet pjesë e Europës. Prandaj, detyra e qeverisë është jo të krijojë Europën armike, por të ushqejë endrën europiane të shqiptarëve tani edhe më shumë se më parë.
E vetmja mënyrë që Shqipëria të ketë një të ardhme të sigurtë dhe me prosperitet është atashimi i saj me Bashkimin Europian, me vlerat dhe standartet që ai përfaqëson. Mirëpo, kjo nuk arrihet duke ja hedhur fajin asaj, por duke përveshur mëngët dhe duke krijuar një shtet demokratik dhe ligjor.
Integrimi në Bashkimin Europian nuk arrihet nëpërmjet retorikave gjeopolitike dhe analizave strategjike, që Shqipëria nuk mund ti bëjë dot dhe as duhet ti bëjë. Integrimi në Bashkimin Europian arrihet vetëm duke patur standarte, ligje,vlera, dhe parime të njëjta me ato që përfaqëson politika e përbashkët e Europiane. /Gazeta Liberale
