Në ditën e fundit për legjislacionin 2017-2021, Kuvendi i Shqipërisë ka votuar për kreun e ri të Autoritetit të Mediave Audiovizive (AMA). Me 83 vota pro, Kuvendi zgjodhi Armela Krasniqin si kryetare të këtij institucioni, ndërsa kandidati tjetër Alket Dibra mori vetëm 9 vota.
Ky vendim i Kuvendit, vjen në kundërshtim me këshillën e dhënë nga BE dhe OSBE. Pak para votimit për kreun e AMA-s në Kuvend, delegacioni i Bashkimit Europian në Shqipëri u ka bërë thirrje ligjvënësve shqiptarë ta shtyjnë këtë procedurë bashkë me emërimin e anëtarëve të bordit të këtij autoriteti në muajin shtator, nisur nga akuzat e opozitë se maxhoranca po tenton ta kapë këtë institucion.
Sipas delegacionit të BE, është e rëndësishme që në këtë proces të mos ketë dyshime mbi natyrën jopartiake, profesionale dhe pluraliste të punës së AMA-s, por Kuvendi e ka refuzuar këtë deklaratë.
Pak më parë, pati një reagim edhe nga kryetari i Partisë Demorkatike Lulzim Basha. Ai tha se ky veprim që po bën kryeministri Edi Rama nuk është forcë, por harbutëri në dëm të të gjithë shqiptarëve dhe të Shqipërisë.
“E ka fajin Europa” llomotit poshtë e lart, për të fshehur dështimin e tij dhe pengimin e Shqipërisë. Por sapo i jepet një shans për të vepruar në shërbim të interesave të vendit, sikurse kërkuan BE dhe OSBE, zgjedh të bëjë të kundërtën, duke hedhur poshtë thirrjen e partnerëve për të shtyrë në shtator votimin për AMA. Kjo nuk është forcë, po harbutëri në dëm të të gjithë shqiptarëve dhe të Shqipërisë.”, shkroi Basha në rrjetin social, Twitter.
