Në kafazin e UFC pritet që të derdhet shumë gjak në muajt e ardhshëm. Dueli që po pritet me shumë interes është ai mes Conor McGregor dhe Khabib Nurmagomedov. Irlandezi është ai që kërkon më shumë këtë përballje, pasi fajëson pikërisht rusin për trazirat e fundit që kanë ndodhur.
The Irish Sun bën të ditur se ylli nga Dublini kësaj radhe nuk është i interesuar për përfitimet, por për meçin. Një burimi pranë kampit të 29-vjeçarit ka bërë të ditur se kjo është përballja që ‘The Notorious’ e do më së shumti dhe do të bëjë gjithçka që mundet për t’i rregulluar raportet me shefin e UFC-së, Dana White, pas incidentit në Brooklyn.
McGregor shkaktoi kaos në Barclays Center duke hedhur sende drejt autobusit të UFC-së, në të cilin u lënduan disa luftëtarë MMA, ndërsa në autobus ndodhej edhe Khabib. Conori u arrestua nga policia njujorkeze, ndërsa në qershor do të paraqitet në gjykatë nënë akuzat për sulm dhe sjellje kriminale.
Në ndërkohë, Nurmagomedov u shpall kampion në kategorinë e peshave të lehta në UFC, pas triumfit ndaj Al Iaquinta. Ky titull më herët i takonte irlandezit, mirëpo White vendosi t’ia merrte për shkak se nuk e kishte mbrojtur që nga viti 2016. Dhe përkundër se do të ketë punë me gjykatën më 14 qershor, McGregor dëshiron të arrijë marrëveshje për t’u përballur me Khabibin në Tetëkëndësh.
“Conor është duke u përpjekur të bëjë gjithçka që mundet për t’u thyer në kafaz dhe e dëshiron me çdo kusht meçin ndaj Khabibit. Kurrë më parë nuk e ka dashur një duel kaq shumë. Nuk i interesojnë aspak paratë, thjesht dëshiron të përballet një me një me këtë tipin, sepse mendon se e gjithë kjo situatë është shkaktuar nga ai dhe dëshiron ta bëjë që të paguajë”.
“Ai do ta zhvillonte këtë meç edhe për kikirikë, dëshiron që të ndodhë”, ka thënë një burim për The Irish Sun. Ishte raportuar se irlandezi kishte shkuar në New York për ta paralajmëruar meçin, para se gjërat të shkonin për të keq në Barclays Center në Brooklyn.
