Ulja e rasteve me koronavirus dhe përmirësimi i situates epidemiologjike, ka bërë që Ministria e Shëndetësisë të vendosë mbylljen e spitaleve rajonale Covid-19.
Nga Elbasani, ministrja e Shëndetësisë Ogerta Manastirliu, deklaroi se tashmë do të rikthehet skenari i pare, dhe në spitalet rajonale, do të ketë një normalitet, ashtu si para pandemisë.
Lidhur me lehtësimin e masave kufizuese, Manastirliu u shpreh se diçka e tillë po mendohet nga Komiteti Teknik i Ekspertëve, por rihapja e plotë e vendit do të jetë e kontrolluar.
Përsa i përket pasaportës së vaksinimit, Manastirliu tha se ende nuk është marrë një vendim nga Bashkimi Europian, nëse do të jetë i detyrueshëm ose jo.
Ogerta Manastirliu: “Kthehemi në skenarin e parë. Mbyllja e pavioneve në spitalet rajonale rikthen në një situatë normaliteti këto spitale. Flasim këtu për spitalin rajonal të Elbasanit, i cili sot nuk ka më pacientë të shtruar. Po mendohet një rivlerësim në kuadër të lehtësimit, por do të jetë gjithmonë një rihapje e kontrolluar. Deri tani vendet e BE-së nuk kanë marrë një vendim nëse do të jetë e detyrueshme vetëm pasaporta e vaksinimit, apo do të jetë dhe komponentët e tjerë që kanë lidhje me testin apo vërtetimin që e ke kaluar Covid, pra qëndrojnë të treja opsionet momentalisht’’.
