Mediat në Britaninë e Madhe shkruajnë se mafia shqiptare po tenton të mbushë vendin me kokainë. Ndërsa autoritetet vendase janë në luftë të përditshme kundër tyre.
Në artikull shkruhet që qendra kryesore e veprimtarisë së tyre kriminale është Londra, ndonëse aktiviteti i tyre shpërndahet në të gjithë Mbretërinë e Bashkuar.
“Bandat nga vendi ballkanik janë përpjekur të kontrollojnë tregun fitimprurës të kokainës në qytet gjatë viteve të fundit. Heroina është lënda narkotike e kontrabanduar tradicionalisht nga kriminelët në Ballkan për shkak se vendndodhja e tyre është në “shtegun e opiumit” nga Afganistani drejt Evropës.
Por, shqiptarët kanë zbuluar se fitime shumë më të mëdha mund të bëhen edhe përmes trafikut të kokainës. Mbretëria e Bashkuar ka një treg të bollshëm të kësaj lënde narkotike dhe për këtë arsye, ata janë tërhequr për të realizuar operacione në këtë vend”, thuhet mes të tjerash në shkrim.
Po ashtu, “Birmingham” thekson se shqiptari Erald Mema, i cili është dënuar me 25 vjet burg, kryesonte një rrjet kokaine miliona dollarësh në Mbretërinë e Bashkuar.
“Mema është koka e një bande shumë të sofistikuar dhe të organizuar, që furnizonte tregun me sasi të mëdha kokaine të pastër”.
