Zaptimi dhe dhënia me koncesion e pasurive hidrike te privatët ka rritur kapacitetin prodhues në tregun e energjisë. Në krahasim me vitin e kaluar, hidrocentralet private kanë rritur me 7 pikë përqindjeje aktivitetin e tyre prodhues.
Kjo tregon edhe njëherë se pse po sulmohen zonat e mbrojtura në Shqipëri për ndërtimin e HEC-ve të reja. Kujtojmë se zonat me piktoreske të Shqipërisë kanë rënë pre e HEC-ve, të cilat tregojnë se përfitimi financiar është shumë i madh.
Kujtojmë se edhe në qarkun e Kukësit janë planifikuar të ndërtohet pesë HEC-e në zonën e cila më parë është shpallur si zonë e mbrojtur. Por, pas mbirjes masive të hidrocentraleve qëndron një e vertete, e cila kuptohet mjaft qartë nga aktiviteti prodhues dhe financiar. Edhe qeveria Rama, duket se është në “presion” nga investuesit, pasi kjo lloj ndërmarrje tregon se ka fitime marramendëse.
Ndërkohë edhe në Osum ka patur përpjekje për të ndërtuar HEC-e, por për shkak të presioneve dhe denoncimeve mediatike, qeveria është tërhequr. Gjithashtu ka patur edhe një nismë për ndërtime në lumin Vjosë, por ka qenë Greqia , që ka ndaluar një përpjekje të tillë me pretendimin se kjo shkatërron biodiversitetin.
Kujtojmë se në lumin e Valbonës po ndërtohen hidrocentrale dhe kjo sipas specialistëve, dëmton rëndë biodiversitetin e zonës, por edhe turizmin alpin. Hidrocentralet private me koncesion zgjeruan pozicionin në tregun e energjisë me 5% gjatë vitit 2017, duke dominuar mbi 35 për qind, nga rreth 28% që ishte vitin e kaluar,sipas bilancit të energjisë për vitin 2017, publikuar nga INSTAT.
Gjate vitit 2017, energjia elektrike në dispozicion u rrit me 4,9 %, raportoi INSTAT. Prodhimi neto vendas i energjisë elektrike, gjatë 2017, është 4.525 GËh, nga 7.136 GËh energji të prodhuar në vitin 2016, duke shënuar rënie të prodhimit prej 36,6 %.
Me rënie të prodhimit të energjisë elektrike, për vitin 2017, kanë rezultuar të gjithë prodhuesit e energjisë, si hidrocentralet publike (-42,7 %) dhe hidrocentralet private dhe koncensionare (-21,3 %).
Rënia e prodhimit të energjisë elektrike, në vitin 2017, ka ndikuar në rritjen e importeve dhe rënien e eksporteve të energjisë elektrike. Importet bruto (energji në marrje) u rritën me 86,3 %, ndërsa sasia e eksporteve bruto (energji në dhënie) u ul me 73,9 %, krahasuar me vitin 2016.
Hidrocentralet publike kanë realizuar 64,5 % të prodhimit të energjisë elektrike për vitin 2017, nga 71,4 % që realizuan në 2016. Përqindja që zënë hidrocentralet private dhe koncensionare në prodhimin neto vendas të energjisë elektrike është 35,5 %, nga 28,6 % që zinte në një vit më parë.
Importi bruto i energjisë elektrike (energji në marrje), në vitin 2017, rezultoi me rritje, duke arritur vlerën 3.403 GWh, nga 1.827 GWh në vitin 2016. Eksporti bruto i energjisë elektrike (energji në dhënie) arriti 488 GËh në vitin 2017, nga 1.869 GWh në vitin e kaluar.
Në vitin 2017, humbjet në rrjet janë 1.876 GËh, nga 1.986 GWh që ishin në 2016, duke pësuar një rënie me 5,5 %. Humbjet në shpërndarje në 2017 kanë rënë 4,3 %, krahasur me vitin e kaluar. Humbjet në transmetim kanë rënë me 16,9 % dhe përbëjnë 8,4 % të humbjeve gjithsej në rrjet.
Përdorimi i energjisë elektrike nga konsumatorët, në vitin 2017, u rrit me 8,9 %, duke arritur vlerën 5.563 GWh, nga 5.108 GWh që ishte në vitin 2016.
Ndikimin më të madh në rritjen e përdorimit të energjisë elektrike nga konsumatorët, e kanë dhënë konsumatorët jofamiljarë, të cilët kontribuan me +7,6 pikë përqindje në vitin 2017, krahasuar me 2016, përkundrejt kontributit prej +1,3 pikë përqindje të energjisë së konsumuar nga konsumatorët familjarë. TIRANA TODAY
