Autoritetet ushtarake në rajonin e Nagorno Karabakut, informuan se 11 ushtarë të tjerë kanë vdekur në luftimet me forcat e Azerbajxhanit, pavarësisht armëpushimit të ndërmjetësuar nga SHBA.
Sipas një liste të publikuar nga shërbimi për media i ushtrisë, në mesin e personave të vdekur është edhe zëvendës-komandanti i Ushtrisë së Mbrojtjes së Nagorno-Karabakut, Artur Sarkisian.
Numri i viktimave në këtë rajon ka shkuar në 1,177 prej kur kanë shpërthyer përleshjet më 27 shtator.
Ndërkohë, Presidenti i Azerbajxhanit, Ilham Aliyev, ka shkruar në rrjetin social, Twitter se forcat e shtetit të tij kanë marrë kontrollin e tetë fshatrave shtesë në operacionet në Nagorno-Karabak.
Nagorno-Karabaku njihet si pjesë e Azerbajxhanit, por armenët etnikë që përbëjnë pjesën më të madhe të popullsisë, refuzojnë rregullin azer.
