Gjykata e Tiranës ka lënë në “arrest me burg” Rozina Kolecin, 38-vjeçaren e cila shkaktoi aksidentin tragjik të 8 korrikut në Kodër Kamzë. Një vajzë 7 vjeçare dhe një burrë me biçikletë gjetën vdekjen e menjëhershme, ndërsa mbetën të plagosur nëna e vajzës dhe motra e saj 6 vjeçare.
Shtetasja Rozina Koleci, që drejtonte makinën me targë AA071UA, fillimisht përplasi për vdekje shtetasin Ramazan Ishni, i cili ishte duke drejtuar biçikletën ne momentin e aksidentit.
Më pas ka përplasur edhe nënën, Valbona Ndreu, 29-vjeçe me dy vajzat e saj që po kalonin në anën tjetër të rrugës. Makina është përplasur më pas dhe me një furgon të bardhë. Sipas saj, e gjitha ndodhi si pasojë e futjes në mënyrë të papritur të biçikletës në rrugë, që i doli para makinës së saj.
“Nuk isha me shpejtësi, në një moment më doli para biçikleta dhe bëra manovër për ta shmangur, dhe aty humba kontrollin”, është shprehur ajo. Aksidenti u shënua tek shinat e trenit.
