Edhe pse ndeshjet e Kategorisë Superiore janë zhvilluar pa tifozë, skuadrës së Tiranës nuk i ka munguar mbështetja gjatë ndeshjeve të fundit.
Në takimin e humbur 1-2 ndaj Kukësit një ditë më parë, bardheblutë u mbështetën nga tifozët e shumtë, të cilët u grumbulluan jashtë stadiumit “Qemal Stafa”.
Por kjo sjellje e tyre është ndëshkuar nga policia, e cila ka nisur procedim penal ndaj 6 prej tyre për grumbullim dhe manifestim të paligjshëm, si dhe mosbindje të urdhrit të policisë për t’u shpërndarë, shkruan “A2”.
Gjithashtu, në bashkëpunim me Inspektoratin Shtetëror Shëndetësor, u gjobit me 1 milion lekë të reja pronari i një lokali në afërsi të stadiumit, pasi lejoi të futeshin dhe të qëndronin në ambientet e brendshme të lokalit, tifozët që nuk po zbatonin urdhrin e Policisë për t’u shpërndarë dhe respektuar distancimin social, urdhër i dhënë disa herë me megafon, që prej fillimit të grumbullimit të paligjshëm e deri në shpërndarjen e plotë të tyre.
