Tani që kanë dalë të dy nga Liga e Kampionëve, pas një periudhe të gjatë duke ndarë pothuajse të gjithë trofetë dhe majën e futbollit bashkë, Messi dhe Ronaldo duhet gjithashtu të pranojnë një realitet aspak komod: janë një kosto e madhe monetare për bilancet e Barcelonës dhe Juves.
Një goditje tjetër për ta është fakti që Evropa po bie në dashuri me Mbappé dhe Haaland. Erëra të reja po fryjnë, shenjat janë ato të një epoke që po mbyllet: nga skena e mbrëmshme e CR7-ës me Porton tek penalltia e humbur nga Leo mbrëmë në Paris. Duket fundi i një binomi të gjatë rivalësh që ka rezistuar për pesëmbëdhjetë vite.
Por koha nuk ishte armiku i vetëm për të ndaluar diktaturën e Ronaldos dhe Messit, të aftë për të fituar nëntë Champions League dhe njëmbëdhjetë Topa të Artë, me një total prej shtatëmbëdhjetë kampionatesh dhe duke shënuar një kuotë marramendëse golash midis tyre, plot 1,324 në nivel klubesh. Rrënja e problemit është gjithashtu një tjetër: ata po paguajnë tranzicionet e Juves dhe Barcelonës, dy skuadrave që humbën në labirintet e një procesi ndryshimi të karakterizuar nga vendime të gabuara.
Në Camp Nou është ende e paqartë se si ishte e mundur të hiqej dorë nga Suarezi ashtu siç është i paqartë dhe vendimi për të ndërtuar një Juve pa një drejtor të qartë dhe duke menduar se Bentancur dhe Arthur mund të kompensonin shitjen e Pjaniçit.
Mbappe-Haaland
Është një Champions që po shënjon një kufi të qartë midis së kaluarës dhe së tashmes, duke theksuar figurat e Mbappésë dhe Haalandit, të cilët kanë hyrë në imagjinatën kolektive dhe me të drejtë.
Francezi është një magjistar që ndërthur elegancën, instinktin, stilin dhe shpejtësinë. Ai ende nuk e ka çuar Topin e Artë në shtëpi, por krahasuar me Messin dhe Ronaldon ai tashmë ka fituar një Kupë Bote. E eliminoi Barcelonën nga Liga e Kampionëve duke shënuar tre gola në Camp Nou dhe një në ‘Parkun e Prinërve’. Kontrata e tij me Paris Saint-Germain skadon në 2022-shin.
Haalandi nga ana tjetër përfaqëson gjysmën tjetër të medaljes në këtë Ligë Kampionësh. Sulmuesi norvegjez, me fizikun e tij prej ‘robokopi’ dhe gjestet e tij akrobatike, vlerësohet për një lexim të rafinuar të rolit: në zonë nuk fal, por gjithashtu arrin të ndikojë tek krahët dhe lëvizjet.
Moderniteti dhe fuqia, inteligjenca dhe shkathtësia. Ai e tërhoqi me vete Borussia Dortmundin në çerekfinale dhe do të largohet në verë: Real Madridi e pëlqen, ashtu si Mbappénë, dhe është pjesë e ëndrrave të Laportës, i sapozgjedhur president i Barcelonës.
