Zëdhënësi i Organizatës Botërore të Shëndetësisë, David Nabarro është shprehur së fundmi se pandemia nuk do të largohet dhe se nuk dihet kur mund të kemi një vaksinë për të.
Në një intervistë për programin radiofonik ‘Today’ të BBC, Nabarro tha se mbajtja e maskave mbrojtëse do të kthehet në një normë.
“Ky virus nuk do të largohet. Nuk e dimë nëse personat që kanë virusin do të mbeten imunë dhe nuk e dimë se kur do të kemi një vaksinë. Për këtë arsye çdo formë mbrojtje e fytyrës jam i bindur që do të kthehet në normë, së paku për t’iu krijuar siguri njerëzve”, tha ai.
Virusi COVID-19 vijon të shënojë mijëra viktima në të gjithë botën, teksa ekspertë të shumtë po punojnë për gjetjen e një vaksine.
Më shumë se 1,8 milionë njerëz nga e gjithë bota janë prekur nga virusi vdekjeprurës, ndërsa mbi 117 mijë persona kanë humbur jetën.
SHBA, Italia, Spanja, Franca, Gjermania, Mbretëria e Bashkuar etj, janë disa nga vendet më të prekura nga COVID-19.
