Dje, Komisioni Hetimor parlamentar “Për hetimin e shkeljeve të rënda kushtetuese nga Presidenti i Republikës së Shqipërisë”, zhvilloi mbledhjen e tij të radhës, ndërsa mbylli procesin hetimor për presidentin Meta. Komisioni Hetimor “Meta 2”, miratoi me shumicën e anëtarëve, procesverbalin e mbledhjes së Komisionit të datës 21 maj 2021, ndërsa kryetari i Komisionit, Alket Hyseni bëri me dije se brenda kësaj jave do të mbahet një tjetër mbledhje. Një koment ka ardhur nga gazetari i njohur Denis Dyrnjaja, në lidhje me kreun e shtetit, Ilir Meta, teksa ishte i ftuar në emisionin “Breaking” në “Top News”.
Sipas tij, Meta e ka humbur betejën si president i vendit. “Mazhoranca nuk është serioze në kërkesat për Metën. Vetë e bëri president, e shpalli si presidentin më të mirë, e tani kërkon shkarkimin e tij.
Tani Meta o është i mirë, ose i keq. Njëherë e anulon Komisionin se nuk kishte bërë krime të rënda. Nuk ke këllqe politike, shko e merre sipas ligjit. Ky është shteti që ne kërkojmë”, tha Dyrnjaja.
Ai u shpreh më tej se shkarkimi i Metës nuk është vetëm kërkesë e PS, pasi në Shqipëri po ndryshojnë disa gjëra falë SHBA-së.
“Nuk është më në dorën e mazhorancës. Është momenti që në Shqipëri disa gjëra po ndryshojnë falë Shteteve të Bashkuara të Amerikës”, tha gazetari.
Kujtojmë këtu se mazhoranca iu drejtua me një kërkesë presidentit Ilir Meta, duke e thirrur për të dëshmuar, por ai refuzoi për të dytën herë pjesëmarrjen në Komision. Me anë të një letre, presidenti u shpreh se e ka bërë të qartë edhe më parë qëndrimin e tij lidhur me Komisionin Hetimor. Ai e quajti veprimtarinë e Komisionit ilegjitime, dhe tha se sipas Kushtetutës, nuk duhet të ekzistonte.
