Ish-deputeti demokrat, Luciano Boçi, ka denoncuar presionin që po u bëhet mësuesve në procesin e Maturës Shtetërore. Ai ka ndarë me ndjekësit e tij në Facebook, një mesazh ku shihet qartë presioni që ushtrohet ndaj mësuesve.
Sipas Boçit, matura ka degraduar, ndërsa është kontestuar jo vetëm nga maturantët, por dhe nga vetë mësuesit.
Sipas mesazhit, mësuesit që nuk paraqiten për të administruar provimet e maturës, do të pezullohen nga puna. Boçi ka akuzuar Ministrinë e Arsimit, se ka humbur çdo logjikë.
Testi është kontestuar ashpër nga mësuesit e letërsisë nëpër gjimnaze. Maturantët pretendojnë rivlerësimin e provimit dhe mosvlerësim të disa pyetjeve.
Statusi
PIKA E DEGRADIMIT TË MATURËS
Matura e sivjetme është e kontestuar jo vetëm nga maturantët, por dhe nga mësuesit.
Këta e dinë aq mirë shkallën e degradimit të maturës, sa hezitojnë të jenë aktivë në procesin e administrimit.
E ndërgjegjshme për këtë, Ministria e nervozuar nuk harron t’i dërgojë hezitantëve mësuesë, mesazhe kërcënuese për pushime nga puna.
Një dhunë e pakufi dhe sistematike kjo, ndaj mësuesve.
Më turp e zi s’ka ku të shkojë.
Ministria ka humbur çdo logjikë e etikë.
Kërcënimet e tilla dëshmojnë pikën fundore të degradimit të maturës dhe rrënimin e këtij institucioni, me drejtuesë mjeranë e të paaftë.
