Pas sulmeve në KZAZ nr.6, në shkollën profesionale të Bushatit, aty ku militantët e PD i vunë zjarrin me molotov materialet zgjedhore, deputeti i PS-së, Tom Doshi është paraqitur në vendngjarje.
Doshi u shpreh se materialet e dëmtuara do të zëvendësohen dhe se ato do të vijnë me avion nga Sllovenia. Ai tha se të shtunën materialet do të jenë gati edhe qytetarët e Vaut të Dejës do të votojnë.
Sa i përket personave që hodhën molotovin brenda shkollës, deputeti u shpreh se ata do të dënohen sipas ligjit. Kujtojmë se nga përplasjet në Bushat janë plagosur tre policë.
Deklarata e plotë:
Materialet zgjedhore do të zëvendësohen. U lidha me KQZ do të vijnë me avion prej Sllovenie dhe ditën e shtunë janë materialet këtu. Populli nuk do të ketë asnjë shqetësim, ata që kanë kryer këtë akt do të japin llogari para ligjit. Ky është një akt i shëmtuar. Këto gjëra ndodhin në Afganistan, jo në bashkinë e Vaut të Dejës apo në Shkodër. Për ne është pozitive që e pamë se çfarë kanë ndërmend të bëjnë. Do marrin masa që edhe kjo qendër të jetë e mbrojtur. Shkaktarët që kanë kryer këtë sulm do të mbajnë përgjegjësi penale.
